尋日約咗我個朋友食飯,
佢話補祝我生日.
本來約好去灣仔,
因為佢要交功課,
但係臨時話唔駛交,
所以可以改去其他地方.

當我仲未諗到去邊嘅時候,
有個舊朋友msn我問起我本身約咗嗰位朋友,
想話約埋出黎食吓飯.
我話佢聽我其實已經約咗嗰個朋友,
佢就話不如佢都黎.
我心諗, 仲好, 唔駛再約!
亦都即時決定去旺角.

跟住我仲好有心,
問吓另外嘅朋友旺角有咩好食.
諗住大家咁難得見面, 食好啲啦.
朋友話兆萬上面有間.
Ok! All set!

出到去旺角, 我走去搵位先,
點知兆萬上面嗰間已經無咗~
個朋友黎到地鐵站問我點算,
我唔知道... 佢提議去返雅蘭嗰邊.

過到去, 我話雅蘭多中餐, 朗豪坊多西餐,
個朋友即刻揀咗西餐,
所以就上咗朗豪坊.
上面都有好多間,
大家都唔知去邊間好.
忽然間我好想去Mr. Steak,
就係咁, 決定咗.

一入去, 我就有一種好強烈嘅不安感.
周圍望一望, 我就知道呢間就係佢同某某黎過嘅餐廳!
我當時好唔舒服, 好想喊,
但係又要忍住.
結果我成晚無乜出聲,
我啲朋友都唔知我發生咩事...

唔知點解, 好似一切都係整定咁...
經過咁多改變最後決定黎呢間...
其實好奇怪, 我都係啱啱發現佢地嗰啲相,
又會咁啱時間我忽然黎呢度...
似乎係一個考驗.

(... 待續.)