唔係好密, 但得閒都會寫.
我特別留意嘅係人地留俾佢嘅comments,
其實來來去去都只係我, 某某, 同另一個某某嘅女仔朋友會寫.
有啲人寫咗一兩次就無再寫,
可能係咁啱對個topic有感想所以寫囉~
其他時間可能無嘢想reply.
講番我嘅concern,
最初見到某某寫,
我會非常唔開心,
因為好多時啲態度都幾曖昧.
我試過同佢講,
當時我地感情有啲問題,
佢就話佢呢個係public blog,
人地寫乜佢控制唔到.
聽到都幾無奈同心淡.
後黎我地感情好番好多,
我再講開呢樣嘢時,
佢話佢都覺得怪怪地, 會留意吓.
漸漸地某某嘅comments無再咁奇怪,
而且亦慢慢變成間唔中先得一兩個.
對於我黎講真係好安慰,
因為一切變得明朗化,
我對佢亦更加有信心.
但係... 唔知做咩...
呢排某某每一篇都有留...
仲有某某嘅一個女仔朋友都係.
(而家都變埋佢嘅朋友)
雖然內容都係無無謂傾吓偈,
但係始終...
我都係有啲唔係咁鍾意...
見到自己男朋友個blog每日都有兩個女仔覆,
又無其他男/女仔朋友覆,
感覺真係酸溜溜~
有時我會唔睇啲comments,
但係點解好似斬腳趾避沙蟲咁嘅?!
有時我想留comments,
但係個感覺有啲怪,
好似幾個女人喺度爭寵咁嘅?!
唉~ 可能真係諗得太多...
